Lagarlíf og Ölfus Cluster í samstarf
Samstarfið miðar að aukinni miðlun og betri sýnileika ráðstefnunnar um lagareldi, með áherslu á gagnsæi og tengingu við hagaðila.
Lagarlíf, ráðstefna um lagareldi, hefur gert samstarfssamning við Ölfus Cluster með það að markmiði að auka sýnileika ráðstefnunnar og styrkja markvissa miðlun til hagaðila. Samstarfið er liður í áframhaldandi vinnu beggja aðila við að efla upplýsingaflæði, bæta aðgengi að efni og styrkja tengsl milli atvinnulífs, fræðasamfélags og opinberra aðila sem koma að lagareldi á Íslandi.
Markviss miðlun og aukið aðgengi að upplýsingum
Samstarfið beinist meðal annars að markvissari nálgun í miðlun á samfélagsmiðlum, þar sem áhersla verður lögð á að gera efni tengt ráðstefnunni, dagskrá hennar og aðkomu ólíkra hagaðila skýrara og aðgengilegra. Með því er stefnt að því að styðja betur við umræðu um lagareldi, nýsköpun og sjálfbæra uppbyggingu greinarinnar.
„Það er lykilatriði fyrir okkur að vera sýnilegri á samfélagsmiðlum og nýta þá betur til að miðla því sem er að gerast í kringum ráðstefnuna,“ segir Gunnar Þórðarson framkvæmdarstjóri Strandbúnaðar. „Með markvissari miðlun getum við veitt betri innsýn í starfsemi Lagarlífs, þá aðila sem koma að ráðstefnunni og þau verkefni sem tengjast lagareldi hér á landi.“
Gunnar Þórðarson, framkvæmdarstjóri Strandbúnaðar sem stofnað er utan um ráðstefnuna Lagarlíf (Aqua Ice)
Samstarf sem styrkir Ölfus og svæðisbundna hagaðila
Fyrir Ölfus Cluster felur samstarfið í sér mikilvægt tækifæri til að efla sýnileika atvinnustarfseminnar í Ölfusi og skapa vettvang þar sem fyrirtæki, sveitarfélög og aðrir hagaðilar á svæðinu geta kynnt verkefni sín, tækifæri og framtíðarsýn. Ráðstefnan Lagarlíf er þar mikilvægur farvegur fyrir samtal milli innlendra og alþjóðlegra aðila og styrkir stöðu Ölfuss sem lykilsvæðis í þróun lagareldis á Íslandi.
„Samstarfið við Lagarlíf er mjög mikilvægt fyrir Ölfus Cluster og þá fjölmörgu hagaðila sem starfa á svæðinu,“ segir Páll Marvin Jónsson, framkvæmdastjóri Ölfus Cluster. „Með því að tengja saman ráðstefnuhald, miðlun og raunverulega starfsemi í Ölfusi erum við að skapa skýrari heildarmynd af þeim tækifærum sem svæðið býður upp á og styðja við sjálfbæra uppbyggingu atvinnulífs.“
Páll Marvin Jónsson, framkvæmdarstjóri Ölfus Cluster
Byggt á fyrri reynslu og árangursríkri samvinnu
Ölfus Cluster hefur áður komið að verkefnum fyrir Lagarlíf og lagt sitt af mörkum við að skapa heildstæða upplifun í tengslum við ráðstefnuna. Í tengslum við Salmon Tour dag sá Ölfus Cluster um kynningu á verkefnum og tækifærum í Ölfusi, skipulagði heimsóknir til fyrirtækja á svæðinu og bauð þátttakendum upp á veitingar.
Dagskráin gaf þátttakendum og fyrirlesurum tækifæri til að kynnast starfsemi laxeldis í Þorlákshöfn, fá innsýn í þróun og uppbyggingu á svæðinu og tengja saman fræðilega umræðu og starfsemi fyrirtækja á svæðinu.
Sameiginleg sýn um gegnsæi og tengingu við hagaðila
Samstarfið byggir þannig á fyrri reynslu og sameiginlegum áherslum Lagarlífs og Ölfus Cluster um skýrari miðlun, aukið gegnsæi og sterkari tengingu við þá fjölmörgu hagaðila sem koma að þróun lagareldis. Með samstarfinu er lagður grunnur að áframhaldandi samvinnu sem styður bæði við faglegt innihald ráðstefnunnar og langtímahagsmuni svæðisins og atvinnugreinarinnar í heild.
