Sameiginleg umsögn Sveitarfélagsins Ölfuss og Hydros ehf. við drög að frumvarpi til laga um lagareldi hefur verið lögð fram í samráðsgátt stjórnvalda. Umsögnin tekur sérstaklega til landeldis og þeirra sérstöku aðstæðna sem slíkur rekstur býr við í Ölfusi.

Í umsögninni er fagnað því að settur sé heildstæður lagarammi um fiskeldi, en jafnframt lögð áhersla á að landeldi sé frábrugðið sjókvíaeldi og að löggjöfin þurfi að taka mið af þeirri sérstöðu. Landeldi fer fram í lokuðum og tæknilega stýrðum kerfum þar sem fiskvelferð, vatnsgæði og umhverfisáhrif eru að mestu undir beinni stjórn rekstraraðila.

Bent er á mikilvægi skýrra, fyrirsjáanlegra og faglega rökstuddra reglna sem styðja við sjálfbæra uppbyggingu greinarinnar, tryggja fjárfestingaröryggi og skapa trausta umgjörð fyrir atvinnu- og byggðaþróun í sveitarfélaginu. Í umsögninni er meðal annars lögð áhersla á hlutlæg og mælanleg viðmið um fiskvelferð og vatnsgæði, að þéttleiki sé hluti af heildarmati á rekstri en ekki sjálfstætt viðmið, og að reglur um frárennsli og mótvægisaðgerðir byggi á faglegu mati og raunverulegum umhverfisáhrifum.